Gjakova e Re synon të jetë klubi i dytë gjakovar në Superligë

Prishtinë(AsistiOnline) – Një skuadër e re iu është shtuar basketbollit kosovar para pak vitesh.

Bëhet fjalë për klubin ”Gjakova e Re” i themeluar nga disa ish-basketbollistë gjakovarë të cilët kanë synime ambicioze me të.

Pas fitimit të titullit në Ligën e dytë, ky ekip sivjet do të garojë në Ligën e parë e cila pritet që edhe sivjet të jetë mjaftë rivalizuese, për çka natyrisht se nevojitet mobilizim i madh.

Përpos disa transfereve vendore dhe një të huaji, Gjakova e Re sivjet do të drejtohet nga trajneri kroat, Josip Plantak i cili është i biri i ish-trajnerit të Trepçës dhe Rahovecit, Neven Plantak.

Me këto afrime, gjakovarët synojnë që sivjet të jenë prej pretendentëve kryesorë për inkuadrim në elitë dhe pse jo që të jenë klubi i dytë nga Gjakova në Superligë.

Stinori i ri në Ligën e parë nis gjatë vikendit të ardhshëm e Gjakova e re duelin e parë e zhvillon ndaj Happy Dukagjinit në udhëtim.

/AsistiOnline.com/