KLUBET ELITARE KOSOVARE, KËRKOJNË ANULIMIN E VENDIMIT QË I PRIVON NGA NDESHJET E VIKENDIT
Prishtinë(AsistiOnline) – Qeveria e Republikës së Kosovës gjatë ditës së djeshme e ka publikuar vendimin që pezullon aktivitetet sportive në hapësira të mbyllura dhe të hapura në vend e ku përfshihet edhe sporti i basketbollit.
E menjëherë pas këtij vendimi të Qeverisë kosovare, Federata e Basketbollit të Kosovës gjatë ditës së djeshme, ka njoftuar të gjitha klubet anëtare të saj se bazuar në Vendimin e Qeverisë së Republikës së Kosovës të datës 06.11.2020 prej dje, të shtunën e të dielën nuk do të zhvillohen ndeshjet e basketbollit të parapara me kalendarët e garave, më saktësisht nuk do të zhvillohen aktivitetet sportive në palestra.
Nuk ka vonuar shumë dhe një mori ankesa, kryesisht nga klubet e Superligës së meshkujve, jane publikuar në llogaritë e tyre zyrtare në Facebook, shkruan AsistiOnline.com.
Klubet që zyrtarisht kanë reaguar sa i përket këtij vendimi të FBK-së janë: Ponte Prizreni, Golden Eagle Ylli, Sigal Prishtina, Peja, Trepça, Vëllaznimi dhe KBF Bashkimi, por sipas informacioneve të sigurta që posedon AsistiOnline.com nga burimet në teren, pothuajse të gjitha klubet kosovare kanë qene të pakënaqura me vendimin e Qeverisë së Kosovës, që të ndalohen aktivitetet sportive, sepse që të gjitha ju janë përmbajtur maksimalisht dhe në përpikmëri manualeve të lëshuara nga institucionet shëndetësore për mbrojtje nga pandemia.
Në reagim-kërkesat e tyre, thuhet që ndeshjet kampionale duhet të vazhdojnë, sepse klubet e basketbollit në këtë mënyrë po dëmtohen ekonomikisht, pariparueshëm. Mbi të gjitha nuk janë assesi burim as eventual i infeksionit dhe se janë klubet më korrekte në Kosovë, sa i përket menagjimit dhe respektimit të masave të parapara nga institucionet përkatëse për mbrojtje nga pandemia COVID-19 dhe këtë më së miri e dëshmon fakti, se nuk ka pasur asnjë rast të vetëm të infektimit me COVID-19, nga basketbollistët/et kosovarë dhe pezullimi i garave të fundjavës, për to është apsolutisht i padrejtë dhe si i tillë duhet të shfuqizohet menjëherë dhe për këtë, presin edhe reflektimin e institucioneve përkatëse dhe FBK-së.
Gjatë ditës së sotme dhe të nesërme, ishte paraparë që të luhet xhiro e katërt e Superligës së Kosovës në konkurencën e meshkujve e deri në fillim të javës së ardhshme, Federata e Basketbollit tonë, ka njoftuar se do ti njoftojë klubet me hapat e ardhshëm që do ti ndërmarrë në lidhje me aktivitetet e veta që ishin në program për ditët në vijim.
/AsistiOnline.com/
Komentet janë të mbyllura.