Rivali i Pejës në grupe, Chemnitzi i Gjermanisë kampion në FIBA Europe Cup

Prishtinë(AsistiOnline) – Skuadra gjermane, Niners Chemnitz është fituese e turneut prestigjioz evropian të basketbollit, FIBA Europe Cup.

Ekipi i Chemnitz e ka fituar trofeun e çmuar evropian pas koshaverazhit më të mirë në dy ndeshjet ndaj ekipit turk, Bahçesehir Koleji.

Ndeshja e parë në Gjermani kishte përfunduar me fitore të Chemnitzit 85-74, derisa ajo sot u mbyll pas vazhdimeve 105-95 për ekipin turk dhe për një pikë më tepër nga dy ndeshjet, fitorja dhe trofeu i takuan Chemnitzit.

Të kujtojmë se Chemnitzi në grupet e këtij kompeticioni sivjet ishte kundërshtar i ekipit tonë kosovar, Pejës dhe arriti ta mposht klubin verdhezi në të dyja ndeshjet.

Chemnitzi sivjet është në top formë edhe në Bundesligën e fortë gjermane, atje ku bëjnë pjesë dy ekipet Bayerni i Mynihut dhe Alba e Berlinit që luajnë prej vitesh rregullisht në Euroligë.

Vlen të ceket se para 3 vitesh ekipi gjerman hyri për herë të parë nga Liga e parë në Bundesligën e Gjermanisë dhe sot fitoi trofeun e parë në histori të klubit.

Përpos Pejës, sivjet në grupet e FIBA Europe Cup luajti edhe ekipi tjetër kosovar, Trepça që kishte fituar turneun kualifikues në Estoni ndaj Parnus dhe Tindastollit dhe kishte arritur fazën grupore e që më pas ishte eliminuar.

/AsistiOnline.com/