Prishtinë(AsistiOnline) – Skuadra turke e Manisës ka arritur fitore të madhe që në xhiron e parë të fazës grupore të Ligës së Kampionëve.
Ekipi turk ku bën pjesë edhe trajneri kosovar Andin Rashica si asistent, ka shënuar fitore ndaj ekipit të madh spanjoll Murcia 97-103, pas vazhdimeve pasi koha e rregullt u mbyll baraz 85-85, derisa në vazhdime më i suksesshëm u tregua ekipi turk.
Saben Lee ishte mëse fantastik te Manisa sonte me hiç më pak se 36 pikë, derisa u ndihmua nga Javon Freeman-Liberty me 22 pikë e Huggo Beson me 16 të tjera.
Sonte me fitore te Manisa debutoi kryetrajneri Ertug Tuzcukaya i cili u emërua në krye të skuadrës jo më larg se para një jave, derisa duket qartë se ka bërë punë të mirë me skuadrën edhe pse është një trajner i ri i cili deri tani kishte drejtuar ekipin e dytë të Fenerbahçes.
Ndërsa te Murcia s’mjaftuan kurrsesi për fitore, Dylan Ennis me 23 pikë e as Vladimir Brodziansky me 13 sosh.
Në xhiron e dytë, Manisa i shkon si mysafire ekipit serb të FMP-së me 9 tetor. /AsistiOnline.com/
