Projekti i palestrës multi-funksionale në Hajvali mbetet pezull: FBK kërkon reagim nga Komuna e Prishtinës

Federata e Basketbollit të Kosovës (FBK) nëpërmjet një reagimi publik, ka shprehur shqetësimin e saj lidhur me vonesat e projektit për ndërtimin e palestrës multi-funksionale, një iniciativë e rëndësishme e përkrahur nga Ministria e Kulturës, Rinisë dhe Sportit (MKRS) dhe FIBA.

MKRS ka ndarë fondet e nevojshme për realizimin e projektit që në janar 2024, ndërsa FBK ka finalizuar dizajnin dhe është dakorduar me Komunën e Prishtinës për vendosjen e lokacionit në Hajvali, pranë stadiumit të Federatës së Futbollit të Kosovës. Megjithatë, pavarësisht përfundimit të projektit zbatues, FBK ende pret që Komuna e Prishtinës të marrë vendimin për ndarjen e lokacionit, një hap thelbësor për nisjen e procedurave të ndërtimit.

Çfarë përfshin projekti?

Projekti i palestrës multi-funksionale është dizajnuar për të përmbushur nevojat e komunitetit sportiv. Ai parashikon:

• Një palestër moderne me kapacitet deri në 700 ulëse, e pajisur me të gjitha standardet për stërvitje dhe ndeshje.
• Një opsion tjetër që përfshin ndërtimin e një konvikti me mbi 50 shtretër, restorant dhe hapësira për trajnime teorike.
• Infrastruktura moderne që lejon ndarjen e terrenit në tri fusha të basketbollit apo volejbollit.

Projekti është konceptuar për të shërbyer si qendër zhvillimi për sportistët e rinj dhe për organizimin e kampeve zhvillimore, duke përfshirë pajisje teknike të avancuara, hapësira për fitness, dhe zhveshtore sipas standardeve evropiane.

Synimi i projektit

Ky projekt është pjesë e programit afatgjatë të FBK-së për zhvillimin e basketbollit dhe sporteve të tjera në Kosovë. Ai pritet të realizohet në dhjetë lokacione në nëntë komuna të vendit, përfshirë dy palestra në Prishtinë. Sipas FBK-së, qëllimi kryesor është identifikimi dhe zhvillimi i talenteve të reja, si dhe rritja e kapaciteteve infrastrukturore sportive.

FBK apelon për bashkëpunim

Federata ka bërë thirrje ndaj Komunës së Prishtinës që të ndërmarrë hapat e nevojshëm për ndarjen e parcelës së paracaktuar, duke e konsideruar këtë projekt si jetik për të përmbushur nevojat infrastrukturore sportive të vendit. Sipas FBK-së, palestra dhe konvikti do të jenë pjesë e një kompleksi të integruar që do të kontribuojë ndjeshëm në zhvillimin e sportit në Kosovë.

FBK ka paralajmëruar se ky projekt nuk është pjesë e përgatitjeve për Lojërat Mesdhetare 2030, por është ideuar për të adresuar mungesat infrastrukturore që ndihen prej kohësh në vend.