Bora shënon fitore me shumë vlera ndaj Yllit

Bora po vazhdon me formë të mirë, ku në xhiron e 15-të të ProCredit Superligës shënoi fitore ndaj Golden Eagle Yllit me rezultat 93:80 (20:18, 23:12, 29:26, 21:24).

Periudha e parë ishte kryesisht e baraspeshuar, ku asnjëra skuadër nuk arrinte të shkëputej, duke përfunduar 20:18, derisa në çerekun e dytë, vendasit ishin dukshëm më të mirë, 23:12, për të shkuar në pushim me shifrat 43:30.

Prishtinasit ishin në epërsi edhe në periodën e tretë, madje e ngritën më shumë dhe shifrat pas 30 minutash ishin 72:56. Në dhjetë minutat e fundit, basketbollistët e Borës ruajtën epërsinë dhe shënuan fitore të rëndësishme 93:80.

Te Bora, Desmond Cambridge JR debutoi me 26 pikë, Adem Mekiq kishte 16 pikë e 13 kërcime dhe Jetmir Zeqiri 20 pikë e tetë kërcime, ndërsa te Golden Eagle Ylli, Jan Palokaj u rikthye me 26 pikë e pesë kërcime, ndërsa Lis Shoshi shtoi dhjetë pikë e 13 kërcime.

Bora ka pesë fitore e dhjetë humbje, derisa Ylli shtatë fitore e tetë humbje.