Pas dy sezoneve të plota të mbushura me arritje dhe sfida, trajneri shqiptar nga Ilirida Muja Thaçi ka konfirmuar largimin e tij nga klubi izraelit Elitzur Ramla.
Me një postim emocionues, ai bëri të ditur përfundimin e këtij kapitulli të rëndësishëm në karrierën e tij, duke theksuar se pavarësisht diskutimeve të shumta me bordin drejtues, nuk u arrit një marrëveshje për të vazhduar më tej.
Thaçi përmendi disa nga sukseset kryesore gjatë kohës së tij, përfshirë: Titullin e kampionit, Superkupën, finalen e Kupës dhe pjesëmarrjen në Euro Cup – një arritje e rëndësishme për klubin që gjatë kësaj periudhe është përballur edhe me një sërë lëndimesh dhe pengesash.
Ai falënderoi publikisht bordin drejtues, lojtarët që ndanë të njëjtat vlera, dhe tifozët e vërtetë që e mbështetën me besnikëri, duke shtuar se këto përvoja e kanë bërë më të fortë dhe më të përgatitur për sfidat e ardhshme.
Burime të afërta konfirmojnë se Thaçi tashmë ka disa oferta serioze nga klube të njohura në Evropë, duke përfshirë projekte ambicioze që përkojnë me filozofinë dhe përvojën e tij si trajner. Pas një kohe të suksesshme në Izrael, duket se karriera e Thaçit është në një moment vendimtar për hapin e radhës në nivelet më të larta të basketbollit evropian.
Ai përfundon mesazhin e tij me besim dhe përulësi: “E ardhmja do të sjellë diçka të mirë – dhe unë jam gati.” /AsistiOnline.com
