Peja emëron trajnerin e ri, një amerikan me përvojë evropiane

Klubi i Pejës e ka zyrtarizuar sonte emërimin e trajnerit amerikan Greg Gibson si trajnerin e ri të skuadrës për sezonin e ardhshëm.

Gibson vjen me një përvojë të gjatë dhe të pasur në basketbollin evropian, veçanërisht në Finlandë, ku ka ndërtuar një karrierë solide dhe të suksesshme si trajner.

Ai ka filluar punën si trajner në vitin 2003 me skuadrën finlandeze Kauhajoen Karhu, ku qëndroi deri në vitin 2009, duke udhëhequr ekipin drejt titullit në divizionin e parë dhe promovimit në elitën e basketbollit finlandez. Më pas, ai mori drejtimin e ekipit Nilan Bisons, me të cilin arriti të shpallej kampion i Finlandës dy herë radhazi në vitet 2012 dhe 2013, duke marrë gjithashtu çmimin “Trajneri i Vitit”.

Karrierën e vazhdoi me skuadrën Kataja Basket, ku fitoi edhe një titull kampioni në vitin 2017 dhe u shpërblye me çmime individuale për punën e tij të suksesshme. Gibson ka përvojë të rëndësishme edhe në arenën ndërkombëtare, ku ka udhëhequr skuadrat e tij në garat evropiane si EuroCup dhe FIBA Champions League, duke regjistruar fitore të rëndësishme kundër skuadrave të njohura si CSKA Moska, Panionios, Pinar Karsiyaka dhe të tjera.

Pas një eksperience të shkurtër në Belgjikë me Limburg United, ai u kthye në Finlandë për të drejtuar BC Nokia nga viti 2019 deri në vitin 2024, ku njihej për organizimin e fortë mbrojtës dhe qasjen taktike të disiplinuar.

Emërimi i Gibson nga KB Peja shihet si një hap serioz drejt ndërtimit të një skuadre konkurruese që synon tituj. /AsistiOnline.com/