KB Vëllaznimi ka bërë transferin e radhës në merkato, duke zyrtarizuar transferimin e qendrës së gjatë 218 centimetra, Dren Dedushaj.
Dedushaj karrierën e nisi në Shtetet e Bashkuara të Amerikës, ku për dy sezone ishte pjesë e kolegjit Bryant Bulldogs në NCAA. Pas kthimit në Kosovë, ai u bashkua me Sigal Prishtinën, ku qëndroi për dy edicione, ndërsa dy sezonet e fundit i kaloi te Bashkimi i Prizrenit.
Basketbollisti i gjatë tashmë është pjesë e kuqezinjve të Gjakovës, duke ardhur për të forcuar repartin e brendshëm të Vëllaznimit në prag të edicionit të ri në Superligën e Kosovës.
Klubi gjakovar i ka uruar mirëseardhje Dedushajt, duke i dëshiruar suksese në fanellën kuqezi.
