Klubi i Vëllaznimit nga Gjakova ka zyrtarizuar përforcimin më të ri për edicionin e ardhshëm, duke arritur marrëveshje me basketbollistin e ri kosovar, Jon Ismajli. 20-vjeçari konsiderohet si një nga shpresat më premtuese të basketbollit vendor për të ardhmen, ndërsa tash ka zgjedhur t’i bashkohet projektit të kuqezinjve.
Ismajli ka qenë pjesë e rregullt e gjeneratave të reja të Kosovës, përfshirë edhe Përfaqësuesen U20 këtë verë, derisa ka marrë ftesë edhe nga kombëtarja A në grumbullimet e fundit. Përkundër moshës së re, ai ka arritur të fitojë përvojë të vlefshme duke qenë pjesë e dy prej programeve më të mira të basketbollit në SHBA dhe Republikën Çeke. Pas kësaj aventure, ai iu bashkua KB Prishtinës, ku luajti sezonin e fundit.
Te Vëllaznimi, Ismajli pritet të ketë një rol të rëndësishëm në skuadrën që po ndërtohet për sezonin 2024/25, me pritshmëri që të jetë ndër lojtarët kyç në projektin e ri të klubit gjakovar.
Ky transferim shihet si një hap i madh si për vetë lojtarin ashtu edhe për klubin, që synon të ndërthurë energjinë e të rinjve me përvojën e basketbollistëve më të konsoliduar në Superligën e Kosovës. /AsistiOnline.com/
