Në Samokov të Bullgarisë, përballë Heroes Den Bosch, do të zbresë në parket kampionia aktuale e Kosovës, KB Trepça.
Mitrovicasit janë ndër klubet më të suksesshme të basketbollit kosovar, me mbi 10 tituj kampioni dhe shumë trofe të Kupës, ndërsa vitet e fundit kanë dominuar skenën vendore duke e rikthyer “ethet e gjelbra” në Mitrovicë.
Këtë sezon, Trepça për të dytin vit radhazi është pjesëmarrëse në Basketball Champions League qualifiers, ndërsa vitin e kaluar arriti deri në gjysmëfinale të turneut në Antalia, duke lënë pas një përshtypje të fortë në arenën ndërkombëtare. Më vonë, skuadra u përfshi edhe në FIBA Europe Cup, ku pati përballje me klube nga liga të fuqishme evropiane.
Forma
Trepça e ka nisur mirë sezonin, duke fituar Superkupën e Kosovës ndaj Golden Eagle Yllit, ndërsa në përgatitjet para-sezonale ka zhvilluar ndeshje testuese me rivalët vendorë dhe ekipe nga rajoni.
Skuadra ka bërë disa përforcime të rëndësishme në repartin e brendshëm dhe duket më e balancuar se vjet. Me afrimin e amerikanëve Shawn Jones dhe Chad Brown, si dhe të finlandezit Mustapha Amzil, “xehetarët” kanë fituar forcë fizike dhe opsione të shumta në lojën nën kosh.
Skuadra
Rosteri i Trepçës është përzierje mes përvojës dhe energjisë së re.
- Drilon Hajrizi dhe Mikaile Tmušić janë dy liderët vendorë, me shumë përvojë në ndeshjet e mëdha.
- JaCori Payne dhe Cedric Russell ofrojnë shpejtësi e kreativitet në backcourt.
- Batin Tuna, Dardan Kapiti e Burim Zekiqi, opsione për rotacion.
- Përforcimet e huaja (Jones, Brown, Amzil) pritet të sjellin dimension të ri në lojën e skuadrës.
Ylli i ekipit
Drilon Hajrizi, kapiteni dhe lideri shpirtëror i skuadrës, mbetet simbol i Trepçës. Përfaqësues i Kosovës për vite me radhë, Hajrizi njihet për lojën e tij fizike, vendosmërinë dhe aftësinë për të udhëhequr në momente vendimtare.
Në anën tjetër, amerikanët Payne dhe Russell shpesh marrin rolin e vendimtarëve në sulm, ndërsa Mustapha Amzil shihet si përforcimi që mund ta çojë skuadrën në një tjetër nivel këtë sezon.
Trajneri
Skuadra drejtohet nga Adis Bećiragić, trajner boshnjak me përvojë të madhe në Evropë dhe në përfaqësuesen e Bosnjës. Ai i ka dhënë Trepçës një stil më modern loje, me theks në mbrojtje agresive dhe tranzicion të shpejtë.
Bećiragić kërkon që këtë edicion të shkojë edhe më larg në garat evropiane, duke e ndërtuar skuadrën mbi një bazë solide lojtarësh vendorë dhe përforcime të menduara mirë.
Pritjet
Me ambicien që e karakterizon klubin dhe përkrahjen e fuqishme të tifozëve “Torcida”, Trepça hyn në këtë duel me bindjen se mund të befasojë. Pas sukseseve të njëpasnjëshme në Kosovë, tani sfida është Evropa – aty ku “xehetarët” duan të tregojnë se janë gati për hapin e madh. /AsistiOnline.com/
