Trepça shënoi sonte fitore dramatike ndaj Golden Eagle Yllit.
Mitrovicasit triumfuan ndaj therandave me rezultat 67:65 (20:18, 10:22, 16:13, 21:12).
Çereku i parë ishte i paparashikueshëm e me shumë kthesa, e më pas vendasit kishin epërsi të lehtë, duke e fituar këtë pjesë 20:18. Periudha e dytë i takoi tërësisht mysafirëve, që kishin epërsi deri në 13 pikë, 27:40, kurse pjesa e parë përfundoi 30:40.
Edhe në periodën e tretë, therandasit ruajtën epërsinë, kurse me tre pikë në fund nga mitrovicasit, shifrat pas 30 minutash ishin 46:53.
Drama u zhvillua në dhjetë minutat e fundit, kur vendasit u rikthyen fuqishëm për të kaluar në epërsi 58:57, e më pas u zhvillua përballje shumë interesante, duke u vendosur në fund në Ja’cori Payne me dy pikë nga gjuajtjet e lira, tre sekonda nga fundi.
Ja’cori Payne kishte 18 pikë te vendasit, derisa Trevon Allen 24 te mysafirët.
Trepça ka dy fitore e dy humbje, kurse Golden Eagle Ylli një fitore e tri humbje.
