PRIZRENI RIKTHEHET TE FITORET, VAZHDON FORMA E DOBËT E TREPÇËS

Prishtinë(AsistiOnline) –Ponte Prizreni është rikthyer shpejtë te fitoret, pas humbjes nga rivali lokal Bashkimi në mesjavë.

Skuadra prizrenase ka arritur të triumfojë si vendase ndaj Trepçës nga Mitrovica me rezultat, 95-74.

Pjesa e parë e ndeshjes ishte shumë interesante me Ponte Prizrenin që e mbylli çerekun e parë me avantazh, 27-20, përderisa në çerekun e dytë, mitrovicasit paksa u këndellën dhe fituan këtë periudhë, 19-22 e pjesa e parë u mbyll me rezultat të ngushtë në favor të Ponte Prizrenit, 46-42.

Në pjesën e dytë, Ponte Prizreni e bëri dallimin kryesor të ndeshjes, duke krijuar avantazh të thellë gjatë çerekut të tretë, 21-12, ndërsa në çerekun e fundit(28-20), Prizreni vetëm se e konfirmoi fitoren e 10 sezonale, karshi 4 humbjeve.

Katër basketbollistë arritën pikë dyshifrore në fitoren e Prizrenit sot: Jeremiah Paige(27), Xavier Cannefax(22), Arti Hajdari(16), Urim Zenelaj(11), si dhe i riu Leorit Morina shtoi 8 pikë.

Te Trepça s’mjaftuan për fitore, Erving Walker me 26 pikë, Besnik Azemi e Dillon Smith me nga 13 pikë, si dhe Staphon Blair me 12 sosh.

Ponte Prizreni e mbyll stinorin vjeshtor në pozitën e dytë me 24 pikë, 10 fitore e 4 humbje. Përderisa, Trepça vjeshtën e mbylli në pozitën e fundit me 16 pikë, 2 fitore e 12 humbje.

/AsistiOnline.com/