ASISTI 475: SHPALLEN KAMPIONËT VJESHTOR NË ARTMOTION SUPERLIGË DHE UNIKE

CILA ËSHTË PESËSHJA DHE MVP I FUNDIT PËR VJESHTËN BASKETBOLLISTIKE DHE ÇKA SJELL SUPER-MARATONA E NBA TË SHTUNËN MBRËMA

nga Agon Fehmiu në 20/12/2021

Për ju adhurues të basketbollit në Artmotion dhe Klan Kosova ,

fluturimi basketbollistik nr. 475 në ASIST sjell analizat speciale të xhirove të fundit vjeshtore të dy top ligave të basketbollit tonë: Artmotion Superligës dhe Ligës Unike.

Sonte ju sjellim analizat speciale të ndeshjeve fantastike të xhiros 14 të Artmotion Superligës , në veçanti duelit Trepça – Rahoveci dhe dy derbive të Ligës Unike: Peja –Rahoveci dhe Golden Eagle Ylli – Prizreni 16

Kush dhe pse u shpall kampion në këto dy top ligat e basketbollit tonë?
Cila është Pesëshja e Javës dhe MVP i xhiros së fundit të vjeshtës basketbollistike?

Gjithashtu, sonte analizojmë xhiron e parafundit të vjeshtës në Ligën Unike të Femrave ku kemi ndryshim në renditjen tabelore kurse më të rejat nga parketet ndërkombëtare i nisim me bllokun e veçantë, Shqiptarët në Botë dhe natyrisht Edon Maxhunin i cili po shkëlqen me Den Boschin në Ligën Unike holandezo-belge ku mbetet me sukses perfekt. Ndërkohë, edhe prishtinasi Kenan Spahiu ka ndërruar mjedis dhe nga Spanja është kthyer në Turqi ku e ka kthyer disponimin e mirë dhe formën

As ky ASIST nuk do t’ju lë pa përmbledhjet komplete të ligës më të fortë rajonale në Evropë, ABA Ligë e cila transmetohet ekskluzivisht në ARTMOTION dhe Euroleague e cila solli ndeshje dhe emocione fenomenale që adhuruesit e basketbollit gjithashtu kishin mundësi t’i shikojnë në kuadër të Platformës Artmotion, në veçanti dy ndeshjet e Real Madridit dhe Barcelonës si mysafirë dhe që ishin shumë dramatike.

Krejt në fund vjen ajka: NBA në ASIST.

Java që shkoi në NBA solli disa rekorde historike të cilat ju sjell ASISTI 475 së bashku me përmbledhjen komplete javore dhe sonte këtë do ta analizojmë me mysafirët special, komentatorët e NBA në Artmotion dhe Klan Kosova : Petrit Zeqirin , Engjëll Bërbatovcin dhe Arbon Flugajnë.

Tradita e NBA për Kërshëndella vazhdon dhe këtë do ta shikojmë ekskluzivisht në vendin ku rrah zemra e basketbollit tonë: NBA Christmas Day dhe super maratona me 5 duele rresht në Artmotion.

Gjitha këto dhe shumë më tepër ju presin sonte në kuadër të episodit 475 të emisionit të parë dhe të vetëm për basketboll në shqiptari: ASIST.

E hënë me fillim nga ora 21:00 në Art Sport 1 dhe dhjetë minuta pas mesnate në Klan Kosova.

KËNAQUNI !