Adis Beqiragiq drejt elitës turke tek kjo skuadër?

Prishtinë(Asistionline) – Skuadra e Golden Eagle Yllit mund të mbetet pa trajnerin, Adis Beqiragiq.

E gjithë kjo, për shkak se boshnjako-turku ka marrë ofertë nga skuadra elitare turke, Konyaspor, atje ku ka qenë trajner edhe më herët.

Kështu kanë raportuar mediat turke, duke ju referuar shkarkimit të trajnerit të deritanishëm të Konyas, Engin Gençoğlu.

”Drejtuesit e Konyaspor do të takohen me Aziz Bekir, i cili do të vijë në shtëpinë e tij në Konya të enjten për shkak të festave të fundvitit”, shkruan njëra prej mediave turke.

Drejtuesit e kampionit aktual të Kosovës, lajmet e tilla i kanë mohuar, duke besuar në qëndrimin e Beqiragiqit në ekip, por një ofertë serioze si kjo, aq më tepër kur Konya sivjet po garon në elitën turke, një prej garave më të forta kombëtare në Evropë, mund ta tundojë shumë seriozisht Adisin për tu larguar.

Megjithatë, mbetet të shihet gjatë ditëve në vijim se cilat do të jenë zhvillimet rreth kësaj çështje e AsistiOnline.com do t’ju mbajë të informuar rreth çështjes.

/AsistiOnline.com/