Sonte super-derbi në basketbollin kosovar, Trepça e pret Bashkimin

Prishtinë(AsistiOnline) – Sonte zhvillohet super-ndeshje në hapje të xhiros së tetë në elitën e basketbollit kosovar.

Kampionia aktuale Trepça e pret në ”Minatori” liderin aktual të tabelës dhe të vetmin pa humbje, Bashkimin.

Deri tani, mitrovicasit kanë pesë fitore e dy humbje, kurse prizrenasit shtatë fitore në shtatë ndeshje, duke qenë skuadra e vetme pa humbje në elitën e basketbollit. Kjo është përballja kryesore e kësaj jave, ku atmosfera në Mitrovicë pritet të jetë elektrizuese.

Në ndeshjen e parë në xhiron e parë, Bashkimi e kishte mposhtur Trepçën në ”Sezai Surroi”.

Sfida e sontme nis nga ora 17:00 dhe transmetohet direkt në Klan Kosova-Artmotion. /AsistiOnline.com/