Ludwigsburgu i kushton postim të veçantë e falenderues, Trepçës dhe tifozëve të tyre në Gjermani

Prishtinë(AsistiOnline) – Klubi i njohur gjerman MHP Riesen Ludwigsburg ka ndarë një postim të veçantë për klubin kosovar KB Trepça dhe tifozët e saj, Torcidën, pas dy përballjeve që u mbajtën në kuadër të garave evropiane.

Në postimin e tyre, Ludwigsburgu shprehu mirënjohjen në veçanti për atmosferën e zjarrtë dhe mbështetjen e jashtëzakonshme të rreth 600 tifozëve kosovarë-shqiptarë për të përkrahur Trepçën në Gjermani.

”🇽🇰🤝🏼 | Në skenën evropiane, ka gjithmonë mbrëmje të mrekullueshme, aventura të reja dhe klube fantastike: Sezoni aktual na ka dhuruar shumë kënaqësi, fillimisht para tre javësh në Mitrovicë dhe mbrëmë në MHPArena. Në këtë atmosferë të bukur, rreth 600 tifozë kosovarë-shqiptarë kontribuuan padyshim për ta bërë ngjarjen edhe më të veçantë. Përballjet e para historike mes dy klubeve ishin të jashtëzakonshme. Gëzohemi shumë që mund të ketë një vazhdim të këtyre takimeve në të ardhmen. Faleminderit, KB Trepça!”, shkruan postimi i klubit gjerman.

Me këtë postim të ngrohtë, Ludwigsburgu vlerësoi pasionin dhe përkushtimin e tifozëve të Trepçës, duke bërë që emocionet e lojës të përjetohen në të dyja anët. Atmosfera që krijuan Torcida dhe mbështetësit e tjerë të Trepçës mbetet e paharrueshme për klubin gjerman, duke theksuar kështu miqësinë sportive që po krijohet mes dy klubeve.

/AsistiOnline.com/