Turqia mposht Greqinë në Piraeus dhe siguron çerekfinalen e Eurobasket 2025 për Femra

Turqia ka arritur një fitore të madhe dhe vendimtare ndaj Greqisë në kuadër të fazës eliminatore të Eurobasket 2025 për Femra, duke triumfuar me rezultatin 72-83 në zemër të Piraeusit. P

ërkundër faktit që luanin në një atmosferë të zjarrtë dhe përballë publikut vendas, vajzat turke të udhëhequra nga trajneri me prejardhje shqiptare, Ekrem Memnun, zhvilluan një ndeshje të shkëlqyer dhe siguruan kualifikimin në çerekfinale të kompeticionit.

Tilbe Şenyürek ishte lojtare vendimtare për Turqinë, duke shkëlqyer me 19 pikë të realizuara. Ajo u përkrah nga Gökşen Fitik dhe Alperi Onar, që kontribuan me nga 14 pikë secila, duke qenë kyçe në suksesin e skuadrës. Për vendaset, përpjekjet e Artemis Spanou, e cila shënoi 20 pikë, dhe Pinelopi Pavlopoulou me 16 pikë të tjera, nuk ishin të mjaftueshme për të ndalur hovin e Turqisë.

Me këtë fitore, Turqia jo vetëm që i dha fund ëndrrës së Greqisë për të vazhduar më tej në këtë kampionat, por edhe konfirmoi forcën dhe përgatitjen e saj për fazën tjetër. Tashmë, skuadra e Memnunit pret të mësojë emrin e kundërshtarit të radhës në çerekfinale, ku synimi është vazhdimi i rrugës drejt medaljes.

Eurobasket 2025 për Femra po dëshmon të jetë një arenë ku Turqia po tregon potencialin e saj, ndërsa ndeshjet e radhës priten me padurim nga tifozët. /AsistiOnline.com/