Kosova U20 po shkëlqen në Evropian: Fitojnë ndaj Hungarisë dhe mbajnë bilancin 100%

Kombëtarja U20 e Kosovës në basketboll për meshkuj ka regjistruar një tjetër fitore të madhe në Kampionatin Evropian – Divizioni B, që po zhvillohet në Yerevan të Armenisë.

Djelmoshat e trajnerit Andin Rashica mposhtën sonte Hungarinë, njërën nga favoritët e grupit, me rezultat të ngushtë por të merituar 78-73, duke vazhduar rrugëtimin e tyre me tre fitore nga po aq ndeshje.

Heroi i kësaj ndeshjeje ishte Erolt Rrahmani, i cili shkëlqeu me një paraqitje dominuese, duke realizuar një double-double prej 21 pikë dhe 11 kërcime. Ai mori mbështetje të fuqishme nga Jon Ismajli dhe Hadis Durguti, të cilët kontribuuan me nga 17 pikë secili, duke qenë kyç në ruajtjen e epërsisë dhe menaxhimin e lojës në momentet vendimtare.

Kjo fitore ka vlerë të dyfishtë për Kosovën, jo vetëm sepse vjen ndaj një kundërshtari të fortë si Hungaria, por edhe sepse përfaqësuesja jonë tashmë ndan kreun e grupit me Turqinë – një tjetër skuadër me tri fitore. Përballja e radhës mes Kosovës dhe Turqisë do të vendosë liderin e grupit dhe pritet me shumë interes.

Kjo është një nga paraqitjet më të mira historike të Kosovës në këtë kategori, me një bilanc që nuk mbahet mend në garat evropiane. Po shihet qartë se puna e trajnerit Rashica dhe stafit të tij teknik po jep frytet e veta, duke ndërtuar një skuadër të disiplinuar, luftarake dhe të përkushtuar. /AsistiOnline.com/