RAHOVECI GJUNJËZON PRISHTINËN NË ‘’MIZAHIR ISMA’’

Prishtinë (AsistiOnline) – Rahoveci e ka fituar takimin e dytë final të ‘’Play Off’’-it në Superligën e basketbollit tonë ndaj Prishtinës.

Ekipi i Rahovecit që sivjet shkruajti historinë e ekipit, ka arritur të shkaktojë senzacion duke e mposhtur ekipin e fuqishëm të Prishtinës që sivjet nuk pati as një humbje në Kosovë, por Rahoveci arriti t’ia shkaktojë sonte humbjen e parë.

Ndeshja qysh në fillim u pa, se do të jetë shumë interesante, por që Prishtina arriti ta mbyllë çerekun e parë në avantazh 15-22. Ndërsa në çerekun e dytë, Rahoveci përmirësoi lojën dhe arriti ta ngushtonte në maksimum ndeshjen, kjo bëri që pjesa e parë të mbyllej minimalisht në favor të prishtinasve 41-43.

E në pjesën e dytë, erdhi përmbysja e madhe e ”vreshtarëve” të cilët me lojë të mirë në sulm dhe mbrojtje arritën ta mbyllnin çerekun e tretë +4 në epërsi 68-64. Dhe krejt në fund, në periudhën vendimtare përkundër presionit të madh dhe mbrojtjes së çeliktë të Prishtinës, Rahoveci arriti fitoren historike me shifrat 87-84.