PRISHTINA MBYLLI STINORIN VJESHTOR ME FORMËN MË TË DOBËT NË HISTORI TË SAJ!
Prishtinë(AsistiOnline) – Skuadra më e trofeshme në historinë e basketbollit kosovar, Sigal Prishtina po kalon nëpër formën më të dobët që nga themelimi si klub dhe është duke e rrezikuar edhe mbijetesën në elitë, shkruan AsistiOnline.com
Nuk mbahet në mend që ndonjëherë, Sigal Prishtina ti ketë pësuar 10 disfata në komplet vitin kalendarik e lëre më, që ti pësojë 10 sosh, brenda një gjysmëstinori, por që kjo i ka ndodhur sivjet.
Në fakt loja e mirë e skuadrës që deri në vjeshtë u drejtua nga trajneri i ri dhe perspektiv, Andin Rashica, nuk është se mungoi, por përforcimi i të gjitha ekipeve kundërshtare me lojtarë të huaj dhe mungesa e këtyre të fundit te Prishtina, si duket ndikoi direkt në rezultatet e Prishtinës.
Prishtina stinorin vjeshtor në elitën e basketbollit kosovar e mbylli në pozitën e 6-të me 18 pikë, 4 fitore dhe plotë 10 disfata dhe gjithë këto rezultate negative synon që gjatë pranverës ti rikthejë në pozitive edhe pse do të jetë tejet e vështirë, duke marrë parasysh përforcimet dhe synimet e shumta edhe të skuadrave tjera kosovare.
Në fakt i tërë ky gjysmëstinor, nuk ishte krejt i zi për Prishtinën, kjo pasiqë kryeqytetasit edhe pse me komplet roster vendor në fillim të edicionit u stolisën me Superkupën e Kosovës, duke mposhtur në finale Bashkimin e Prizrenit.
Kur jemi në fillimin e afatit kalimtar të transfereve, krerët e Prishtinës kanë paralajmëruar ndryshime të shumta në roster, për ta këndellur ekipin nga kryeqyteti dhe për t’ju ikur pozitave të fundit në tabelë dhe deri atëherë të presim e të shohim se si do të rrjedhin zhvillimet te prishtinasit.
Që në fillim të afatit kalimtar dimëror, prishtinasit kanë emëruar për trajner të ri të ekipit, malaziasin, Dragan Radoviç dhe kanë transferuar, alo-qendrën amerikane, Seth Leday e ‘kuleta’ për transfere tek ta, nuk pritet të mbyllet me kaq dhe për çdo zhvillim të fundit në klubin e Prishtinës, AsistiOnline.com do t’ju mbajë të informuar dhe me kohë.
/AsistiOnline.com/
Komentet janë të mbyllura.