Gençoglu shkon larg: Po të jetë kundërshtar edhe Real Madridi, Trepça do të jetë kampione

Prishtinë(AsistiOnline) – Trajneri turk i Trepçës, Engin Gençoglu e ka nxehur tej mase atmosferën me intervistën pas ndeshjes me Vëllaznimin.

Gençoglu, që edhe në fillimet e tij te Trepça, kishte thënë se klubi mitrovicas po rikthehet, përsëri ka bërë një deklaratë ‘zhurmuese’ dhe ka paralajmëruar fitimin e titullit me ekipin mitrovicas.

43 vjeçari nga Izmiri ka shkuar aq larg, saqë ka deklaruar se edhe po të jetë Real Madridi kundërshtar, Trepça sivjet do të dalë kampione.

”E dini që kam thënë se Trepça është rikthyer dhe ajo u rikthye. Ndërsa tash po ju them Trepça do të bëhet kampione. Mos e harroni këtë, Trepça do të bëhet kampione, pa marrë parasysh kundërshtari kush është, Prishtina, Bashkimi, Ponte Prizreni, apo edhe Real Madridi, unë besoj në ekipin tim, unë besoj në tifozët e mi”, deklaroi ai.

Të kujtojmë se Gençoglu me Trepçën e fitoi Kupën e Kosovës, pak ditë pasi mori drejtimin e klubit. Ai aktualisht ka bilanc 8-2, prej se mori drejtimin e ‘minatorëve’. /AsistiOnline.com/