FIBA PUBLIKON REKOMANDIME PËR KTHIMIN E BASKETBOLLIT

Shtëpia kryesore e basketbollit, FIBA ka publikuar rekomandime për kthimin në basketboll me udhëzimet për Federatat Kombëtare cilat janë përballë me pandeminë COVID-19. Një mjet specifik për vlerësimitn e rrezikut është prodhuar gjithashtu në bashkëpunim me Organizatën Botërore të Shëndetit.

Udhëzimet e FIBA, të botuara në anglisht, frëngjisht dhe spanjisht, janë kryesisht për Federatat Kombëtare që janë duke kërkuar drejtim dhe këshilla për rinisjen e aktiviteteve dhe garave të basketbollit. Udhëzimet dhe mjeti i vlerësimit të rrezikut do të shërbejnë si një listë kontrolli për të siguruar që vendimet mbi ngjarjet në basketboll bazohen në një vlerësim të rreziqeve dhe shansave më të mira për një rifillim të suksesshëm.

Udhëzimet janë hartuar nga Kryetari i Komisionit Mjekësor FIBA, Dr. Peter Harcourt nga Australia, pas konsultimit të tij me Grupin Këshillimor Mjekësor FIBA ​​COVID-19, dhe gjithashtu të dy Komisionet e Mjekëve dhe Lojtareve të FIBA-s.

Federata e Basketbollit e Kosovës (FBK) poashtu ka publikuar lajmin dhe në njoftim thuhet se do t’i analizojë në detaje Udhëzuesit dhe materialet tjera të përgatitura nga FIBA dhe do të veprojë konform situatës në vendin tonë duke respektuar maksimalisht vendimet e autoriteteve përgjegjëse në Kosovë.

FBK së fundi e ka përgatitur Udhëzuesin për Rikthimin në Fushat e Basketbollit dhe i njëjti pritet të hyjë në fuqi nga 1 qershori, në rast se Ministria e Shëndetësisë e jep dritën e gjelbër për hapjen selektive të aktiviteteve sportive që bën pjesë në fazën e tretë, e cila është paraparë të fillojë më 1 qershor.

Dokumentet janë në dispozicion për t’u shkarkuar nga qendra e dokumenteve FIBA ​​COVID-19:

http://www.fiba.basketball/documents#|tab=282d33a4-e941-4db5-838e-bbea20ca184d