FITORE DRAMATIKE E TREPÇËS NË DERBIN NDAJ PRIZRENIT

Prishtinë(AsistiOnline) – Trepça e ka fituar derbin e xhiros së dytë në Art Motion Superligë ndaj Prizrenit.

Mitrovicasit kanë arritur fitore shumë të vështirë ndaj Prizrenit 16 me rezultat përfundimtar 97-90, por me shumë vlera dhe të merituar.

Ishte kjo një ndeshje fantastike të cilën më mirë e nisi Trepça, duke fituar periodën e parë 31-23, derisa shpejtë erdhi reagimi i Prizrenit që e fitoi të dytën 18-26 dhe skuadrat shkuan në pushim me rezultat të barabartë 49-49.

Në pjesën e dytë vazhdoi loja e ngushtë edhe pse Trepça e fitoi tejet thellë çerekun e tretë 31-18, Prizreni shpejtë u rikthye në lojë, duke e bërë duelin dramatik, por që përkundër se fitoi periodën e katërt 17-23 e humbi ndeshjen, shkaku i deficitit të madh nga çereku i tretë.

Te Trepça në fitore sot komplet pesëshja e parë realizoi pikë dyshifrore, Drilon Hajrizi(22), Samir Zekiqi(20), Ty Cockfield(17), Gerald Blackshear(15) e Amin Hot(11).

Te Prizreni 16 nuk mjaftuan për fitore, Courtney Fells me 29 pikë, Ivan Koljeviq me 25 dhe Urim Zenelaj me 14 pikë e 12 kërcime.

Në xhiron e tretë, Prizreni 16 luan ndaj Yllit e Trepça luan ndaj Dritës.

/AsistiOnline.com/