EDHE NJË LAJM FANTASTIK, EDHE ASTERA TUHINA NGA SPANJA NË NCAA1

Njëra nga basketbollistet më të talentuara të Kosovës, Astera Tuhina ka bërë një hap të madh në karrierën e saj. Tuhina ka nënshkruar për kolegjin ”Washingon State Cougars” në SHBA, ku do të garojë në NCAA Divizioni 1.

Astera do të jetë pjesë e ”Washingston State” nga edicioni i ardhshëm. Ajo aktualisht do të vazhdojë të luajë në Spanjë, te skuadra elitare spanjolle ”Deportivo Promete” e më pas nga edicioni i ardhshëm do të transferohet te kolegji në fjalë.

Trajnerja e Washington State, Kamie Ethridge është shprehur shumë e lumtur për nënshkrimin me basketbollisten e Kosovës, duke e lavdëruar atë dhe duke shtuar se do të jetë pjesë e rëndësishme për edicionin e ardhshëm. “Ajo ka pasion, këmbëngulje, ashpërsi dhe një përpjekje të pamëshirshme për të bërë gjithçka që duhet që ekipi i saj të ketë sukses. Ajo mund të gjuajë për 3 pikë dhe ajo është shumë kreative në lëvizjet e saj drejt koshit. Energjia me të cilën luan Astera është ngjitëse dhe tifozët tanë do ta pëlqejnë sa fort luan. Jemi të emocionuar që kemi fituar besimin e Asterës dhe familjes së saj. Ajo do të jetë një shtesë e shkëlqyer për familjen tonë”, u shpreh Ethridge.

Astera Tuhina është vetëm 17 vjeçare dhe ka luajtur për të gjitha grupmoshat e Kosovës, si dhe ka debutuar për Kosovën A në FIBA Kampionatin Evropian për Shtete të Vogla në Qipro, si basketbollistja më e re. Gjatë verës së fundit ishte edhe pjesë e Kosovës U20.

Të kujtojmë se AsistiOnline.com sot raportoi edhe për basketbollisten tjetër kosovare, Dea Pushkolli e cila poashtu nënshkroi me një kolegj amerikan nga NCAA1 për edicionin e ri.