RISI INTERESANTE: TREPÇA SOT HAP ”FAN SHOP”-IN ZYRTAR TË KLUBIT

nga Asisti Online në 01/08/2022

Prishtinë(AsistiOnline) – Organizimi i mirë i KB Trepçës në vitet e fundit, ka bërë që drejtuesit e skuadrës të mendojnë më detajisht edhe për tifozët.

Në fakt, pas rezultateve të mira të klubit të zemrës në dy sezonet e fundit, interesimi i madh i tifozëve dhe qytetarëve të Mitrovicës, për t’i pasur në shtëpitë e tyre gjërat që simbolizojnë KB Trepçën, ka qenë tepër i madh.

Nga sot pasdite, rekuizitat e Trepçës, mund ti gjeni në ”Fan Shop”-in zyrtar të klubit i cili hapet zyrtarisht në ora 17:00 pasdite dhe ku pritet të ketë shumë risi.

Në lidhje me këtë risi interesante, klubi i Trepçës tash e sa ditë i ka paralajmëruar edhe tifozët dhe gjithë qytetarët e Mitrovicës që të jenë prezent në hapjen solemne.

”Buzë lumit Ibër e krah për krah me palestrën e zjarrtë “MINATORI”, po buron diçka krejtësisht e re dhe unike në qytetin tonë! Nesër e Hënë, ju presim nga ora:17:00 në hapjën e “Fan Shop-it”, më atraktiv zyrtar të klubit KB TREPÇA!”, thuhet në njoftimin e klubit mitrovicas.

Në këtë dyqan të destinuar ekskluzivisht për Trepçën, do të mund të gjeni produktet si:

Fanellat me emra dhe numra të lojtarëve për të gjitha moshat

Fanella të personalizuara sipas porosisë

Veshje me dizajne të ndryshme me motive të klubit

Filxhan, shishe, termos, mbajtëse të çelësit apo aksesorëve të tjerë, etj etj…

Lokacioni i dyqanit ekskluziv të Trepçës është fare i lehtë, tek Palestra ”Minatori”, konkretisht në rrugën ”Mbretëresha Teutë”.

/AsistiOnline.com/