Anthony Adger largohet nga Vëllaznimi

Prishtinë(AsistiOnline) – Njëra prej ekipeve që po tregon formë tejet të mirë në elitën e basketbollit kosovar sivjet padyshim që është edhe Vëllaznimi i Gjakovës.

Kuqezinjët janë rikthyer sivjet në elitë dhe për dallim nga vitet e tjera, sivjet po tregojnë qëndrueshmëri dhe efikasitet në rezultate pozitive.

Megjithatë, së fundmi tek gjakovarët janë paralajmëruar ndryshime e siç ka mësuar AsistiOnline.com nga skuadra është larguar amerikani, Anthony Adger.

Sipas burimeve të AsistiOnline.com, Adger është larguar nga Vëllaznimi me kërkesën e tij personale dhe klubi menjëherë e ka aprovuar atë, duke e mirëkuptuar vendimin e tij.

Adger me Vëllaznimin luajti në 11 ndeshje me mesatare prej 14.5 pikëve, 2.3 asiste e 2.9 kërcimeve për ndeshje.

Lajmi për largimin e Adger nga Vëllaznimi, pritet të konfirmohet edhe nga skuadra kuqezi gjatë orëve apo ditëve në vijim.

/AsistiOnline.com/