Lojtarët e huaj cilësorë po hezitojnë të vijnë në Kosovë

Prishtinë(AsistiOnline) – Lojtarët e huaj me cilësi po tregojnë gjithnjë e më shumë hezitim për të ardhur në Kosovë për të luajtur basketboll, me faktorë të shumtë që po ndikojnë në vendimin e tyre.

Mes çështjeve më të përfolura që largojnë lojtarët potencialë janë vonesat në pagesa dhe kushtet e vështira teknike me të cilat përballen në klubet tona, shkruan AsistiOnline.com

Shumë klube kosovare kanë krijuar një reputacion të paqëndrueshëm kur bëhet fjalë për respektimin e detyrimeve financiare ndaj lojtarëve të huaj. Raportimet tregojnë se disa lojtarë kanë pasur përvoja të këqija me vonesa në pagesa, çka ka lënë një hije të keqe për klubet e Kosovës. Për lojtarët e dëshmuar, të cilët kanë oferta nga klube të tjera me kushte më të mira, ky është një element që i bën të mendojnë dy herë para se të pranojnë të luajnë këtu.

Kushtet teknike, sidomos gjatë dimrit, janë një tjetër sfidë. Sallat sportive nuk janë të pajisura mirë për ngrohje, por as pajisje të tjera me rëndësi dhe shpesh lojtarët e gjejnë të vështirë të performojnë në temperatura të ulëta e kushte të tilla, çka ndikon në performancën e tyre dhe në gatishmërinë për të qëndruar për një sezon të tërë.

Një tjetër faktor i rëndësishëm është aspekti social dhe ai i sigurisë. Një pjesë e lojtarëve kanë shfaqur shqetësime lidhur me stabilitetin në disa pjesë të Kosovës, sidomos në veri të Mitrovicës, ku shpesh janë ngritur çështje sigurie. AsistiOnline.com ka mësuar se ky element ka ndikuar drejtpërdrejt edhe në klubin e Trepçës, ku lojtarët hezitojnë të angazhohen për shkak të këtyre rrethanave.

Ndërkohë, klubet e Kosovës kanë përballë një sfidë të madhe për të tërhequr lojtarë të nivelit të lartë. Lojtarët e dëshmuar janë pothuajse të pamundur për t’u bindur të vijnë dhe të luajnë këtu pa garanci të qarta financiare dhe pa përmirësime në kushtet e trajnimit dhe lojës.

Për klubet që kanë ambicie të larta, do të jetë jetike të punojnë për përmirësimin e këtyre aspekteve nëse synojnë të ndërtojnë skuadra konkurruese dhe të ruajnë një reputacion të mirë në arenën ndërkombëtare të basketbollit.

/AsistiOnline.com/