Ekskluzive: Bora kryen transfer të madh, afron lojtarin e njohur maqedonas

Prishtinë(AsistiOnline) – Klubi i Borës nuk e ka nisur aspak mirë stinorin debutues në basketbollin kosovar.

Ekipi prishtinas ka vetëm një fitore e 7 humbje pas 8 xhirove të zhvilluara, por që drejtuesit e klubit duket se nuk janë duke ndenjur duarkryq për të ndryshuar këtë gjendje.

Siç ka mësuar AsistiOnline.com, nga tash ekipi i Borës do të jetë i përforcuar me lojtarin e njohur maqedonas Adem Mekic, për të arritur objektivat që ka sivjet.

Lojtari në fjalë është i gjatë 195 centimetra dhe karrierën e ka nisur si pjesë e ekipit më të trofeshëm maqedonas MZT Skopje për plot pesë sezone, pastaj në dy edicionet e fundit mbrojti ngjyrat e ekipit të madh kroat, Zara e së fundmi në këtë edicion ka luajtur deri tani tek TFT Skopje ku luajti me 13.2 pikë, 5 kërcime e 2.8 asiste.

Me MZT Skopjen dhe Zarën, Mekic ka luajtur edhe në ABA Liga 1.

29 vjeçari, është edhe pjesë e rregullt e Kombëtares së Maqedonisë. /AsistiOnline.com/