YLLI MPOSHT PËRSËRI PRISHTINËN, FINALJA LARG VETËM NGA NJË FITORE

Prishtinë(AsistiOnline) – Golden Eagle Ylli e ka arritur edhe fitoren e dytë me radhë në gjysmëfinalen s ArtMotion Superligës së Kosovës në serinë ndaj Prishtinës.

Therandasit sonte mposhtën Prishtinën me rezultatin 79-70, para një atmosfere impozante të krijuar në Palestrën “13 Qershori” nga tifozët vendas.

Ekipi nikoqir e nisi më mirë këtë duel duke i fituar dy periodat e para të takimit (27-21, 14-6) dhe shkoi në pushimin mes pjesëve me avantazhin 41-27.

Në pjesën e dytë, Prishtina e tentoi rikthimin duke e fituar fillimisht çerekun e tretë ngushtë 17-18, derisa lojë të mirë zhvilloi edhe në periodën e fundit 21-25, por deficiti nga pjesa e parë sonte i kushtoi me humbje.

Henrik Shirko sonte ishte enigmë e pazgjidhur për mbrojtjen e Prishtinës me plotë 31 pikë, prej tyre 5 treshe nga 8 tentime, derisa u ndihmua edhe nga Dajuan Graf me 17 pikë dhe Gëzim Morina e Chris Harris me nga 9 pikë.

Te Prishtina ishin të pamjaftueshëm për fitore, Henry Dugat me 25 pikë, Jan Palokaj me 17,  Jetmir Zeqiri me 11 e Muhamedali Janjeva me 10 pikë.

Seria aktuale mes dy ekipeve aktualisht është 2-0 në favorin e Yllit, derisa tash ndeshja e radhës luhet gjatë vikendit në Prishtinë.

Yllit i duhet vetëm edhe një fitore për kalim në finalen e madhe, derisa Prishtina ka punë të madhe nëse dëshiron diçka më shumë.

/AsistiOnline.com/