Bashkimi kampion i Kosovës te femrat për këtë edicion
Skuadra e Bashkimit ka fituar titullin e kampionit në Superligën e femrave në basketboll. Në ndeshjen e pestë të serisë finale të plejofit, Bashkimi e mposhti Prishtinën për t’u shpallur kampion me rezultatin e përgjithshëm 3:2.
Dueli i luajtur të martën mbrëma në palestrën “13 Qershori” në Suharekë, ku Bashkimi ishte vendas përfundoi me shifrat 78:64 në të mirë të prizrenasve.
Prej fillimit të ndeshjes Bashkimi ishte dominues, ndërsa shkëputjen e bëri në çerekun e dytë, të cilin e fitoi me shifrat 19:8.
Khadija Brown-Haywood e udhëhoqi Bashkimin drejt suksesit me 24 pikë, 12 kërcime e 7 asistime. Ndërsa, me lojë të mirë u veçuan edhe Dasia Evans (16) e Arbnore Përquku (12).
Te Prishtina u veçuan Kaela Hilarie me 21 pikë e Agnesa Rrahmani me 10 sosh.
Për Bashkimin, ky është titulli i parë prej vitit 2018, ndërsa trofeu i tretë këtë sezon pas Superkupës dhe Kupës së Kosovës.
Komentet janë të mbyllura.