KOSOVA MPOSHTET THELLË NGA DANIMARKA, ELIMINOHET NË PARAKUALIFIME PËR EUROBASKET

Prishtinë(AsistiOnline) – Përfaqësuesja e Kosovës A në konkurrencën e meshkujve e ka mbyllur aventurën në parakualifikimet për Eurobasket 2025 me humbje të thellë.

Ekipi kosovar u mposht sonte thellë në Naestved të Danimarkës me epilogun final 105-71.

Që në start, danezët e morën kontrollin e kësaj ndeshje duke i fituar të gjitha periodat (26-19, 20-17, 30-17, 29-18) e Kosova që në këtë ndeshje kishte udhëtuar me shumë mungesa, tentoi deri diku në pjesën e parë të mbahej në lojë, por në pjesën e dytë ra komplet nga sistemi dhe pësoi thellë.

Tre basketbollistë realizuan pikë dyshifrore te Kosova sot, Dardan Berisha e Drilon Hajrizi me nga 17 pikë dhe Amin Hot që shtoi 10 sosh.

Te Danimarka në fitoren e thellë u dalluan, Kevin Larsen me 20 pikë dhe Leonardo Carlino me 14 sosh.

Kosova e mbyll kampanjën parakualifikuese të Eurobasket 2025, duke u eliminuar dhe me bilanc prej 1 fitoreje e 3 humbjeve.

/AsistiOnline.com/