KUALIFIKIMET PËR FIBA 3X3 EUROPE CUP 2020:  KOSOVA 3X3

Prishtinë (AsistiOnline) – Pas debutimit historik vitin e kaluar, përfaqësuesja e Kosovës në basketbollin 3×3 edhe sivjet do të marrë pjesë në kualifikime për FIBA 3×3 Europe Cup 2020 që do të organizohet në Antwerp të Belgjikës më 25-27 Qershor, më herët se vitin e kaluar për shkak të Olimpiadës Tokio 2020 ku basketbolli 3×3 do të debutoj për herë të parë si sport olimpik.

 

Sivjet edhe garat kualifikuese mbahen më herët dhe atë në dy grupe, me 22-23 Maj në Tel Aviv(Izrael) dhe me 23-24 Maj në Konstanca (Rumani) ndërsa shorti e ka dashur që kualifikimet për në Antwerp, Kosova t’i kërkoj sërish  përmes garave kualifikuese në grupin që luan në Konstanca të Rumanisë, pikërisht aty ku Kosova 3×3 e pati debutimin ndërkombëtar, vitin e kaluar.

 

 

Në turneun final të FIBA 3×3 Europe Cup 2020 do të luajnë 12 kombëtare ndërsa kualifikimin direkt e kanë siguruar këto shtete

1. Belgjika (nikoqir)
2. Serbia (fitues 2019)
3. Rusia         (1)
4. Holanda (4)
5. Franca       (5)
6. Rumania (7)
7. Estonia      (9)
8. Ukraina (10)
9. Letonia (11)
10. Italia (12)

(numri në kllapa paraqet renditjen e federatës kombëtare në FIBA 3×3 të kombinuar në të dyja konkurrencat, meshkuj e femra, pas fillimit të edicionit të ri 3×3 më 1 nëntor 2019)

Gjatë kualifikimeve në Konstanca të Rumanisë (23-24 Maj, 2020), kundërshtarët potencial të Kosovës 3×3 do të jenë këto shtete

1. Rumania (7)
2. Bjellorusia (15)
3. Zvicra (16)
4. Çekia (22)
5. Sllovakia (39)
6. Suedia (49)
7. Austria (51)
8. Greqia (78)
9. Kroacia (83)
10. Andorra (45)
11. Bullgaria (74)
12. Maqedonia (95)
13. Kosova (114)
14. San Marino (n/a)

Grupi kualifikues në Tel Aviv(22-23 Maj, 2020) do të përbëhet nga këto kombëtare

1. Izraeli (29)
2. Gjermania (14)
3. Hungaria (18)
4. Spanja (20)
5. Lituania (44)
6. Portugalia (52)
7. Turqia (53)
8. Polonia (13)
9. Sllovenia (28)
10. Bosnja e Hercegovina (82)
11. Gjeorgjia (87)
12. Mali i Zi (n/a)

Sikurse vitin e kaluar , gjatë kualifikimeve, në fazën e parë kombëtaret do të ndahen në 4 grupe me nga tri apo katër skuadra dhe vetëm fituesit e grupit kalojnë në gjysmëfinale dhe më pas finale.

Krejt në fund, vetëm fituesit e turneve në Konstanca dhe Tel Aviv e fitojnë të drejtën e paraqitjes në Antwerp në turneun final të FIBA 3×3 Europe Cup 2020.

 

DEBUTIMI HISTORIK NË VITIN 2019

T’ju rikujtojmë se vitin e kaluar në paraqitjen e saj historike Kosova 3×3 doli e 6-ta në kualifikimet për FIBA 3X3 Europe Cup 2019 në Kontanca të Rumanisë, duke arritur që në renditjen finalet’ua kaloj shteteve që janë fuqi në këtë sport si: Rumania, Turqia, Andorra por edhe Azerbajxhani dhe Irlanda.

Kosovën, në kualifikimet historike për FIBA 3×3 Europe Cup në Konstanca të Rumanisë e përfaqësuan kapiteni me Altin Sahiti, Arti Hajdari, Arian Mehmeti dhe lojtari më i mirë i ranguar në Kosovë, Albatrit Berisha ndërsa ekipin e udhëhoqi koordinatori Agon Fehmiu.

Kosova dy ndeshjet e fazës së grupit i zhvilloi ndaj top-skuadrës botërore, Sllovenisë dhe Andorrës që në renditjen e botërore ishte për 80 pozita më e mirë se Kosova.

Dëshira e madhe për të startuar me fitore bëri që lojtarët e Kosovës 3×3 mos të japin më të mirën gjatë duelit me sllovenë, duke bërë shumë gabime dhe sllovenët e shfrytëzuan përvojën e tyre duke triumfuar me plotë meritë me rezultat 21:8. Vetëm gjysmë ore më vonë pas humbjes nga Sllovenia, përfaqësuesja jonë u përball me Andorrën dhe e demoloi atë me rezultat 21:6 duke shënuar fitoren e parë historike.

 

Altini, Albatriti, Arti dhe Ariani dominuan plotësisht, nga fillim deri në fund dhe shfaqë lojë fantastike. Art Hajdari realizoi 8 pikë, Altin Sahiti i shtoi 6 tjera,  Albatrit Berisha 4 dhe Arian Mehmetit 3 pikë për t’i sjell Kosovës fitoren e parë në histori të paraqitjeve të reprezentacionit në garat ndërkombëtare. Për këtë fitore, vet drejtori i FIBA 3×3 Robert Riblinger e uroi koordinatorin Agon Fehmiun duke e theksuar rëndësinë e kësaj fitoreje e cila do të hyjë në anale të kësaj loje.

 

Krejt në fund, me këtë paraqitje, Kosova mbylli kampanjën kualifikuese historike në FIBA 3×3 Europe Cup 2019 në Konstanca të Rumanisë me një  humbje dhe  një  fitore duke u renditur e 6-ta.