PËR FUND TË EDICIONIT, ASISTI SJELL DHURATË SPECIALE

Adhurues të basketbollit,

ASISTI 420 do të jetë episodi i fundit për këtë edicion të basketbollit kosovar i cili u ndërpre për shkak të pandemisë me COVID-19 dhe mbylljen e këtij edicioni të pazakonshëm do ta bëjmë në mënyrë sa më të bukur dhe speciale

Të hënën nga ora 21, në Art Sport 1 në Artmotion, ju pret një prej ASISTAVE më special sivjet.

Javët e kaluara, ASISTI ka prezantuar  analizat shumë të veçanta dhe speciale, si asnjëherë deri tash. Kjo punë e madhe dhe e mundimshme do të rrumbullakohet me shpalljen e Pesëshes më të mirë të Superligës për sivjet, Pesëshes më të mirë vendore dhe në fund, MVP-së apo Lojtarit më të Vlefshëm për stinorin e ndërprerë 2019/2020.

Pas shpalljes së më të mirëve të elitës së basketbollit kosovar për sivjet, direkt nga shtëpia e tij në Athinë, na vjen Christos Marmarinos selektori i Kosovës dhe intervista e tij ekskluzive.

Vetëm dy muaj pasi startoi suksesshëm me Përafqësuesen e Kosovës në Parakualifikimet për Botërorin 2023  duke shënuar fitore ndaj Islandës dhe Luksemburgut, në kohën kur kishte planifikuar të vinte në Kosovë për Play Off, selektori Marmarinos  është në karantinë dhe i ngujuar në shtëpi, sikurse e tërë Bota.

Krejt në fund… ajka e ajkave!

Për gjithë ju që e keni harru apo kurrë deri tash nuk e keni parë, ASISTI ka një dhuratë super-speciale: RETRO ASISTI – ALEKSANDRIA 2005

ASISTI e kthen kohën prapa kur para 15 vitesh, përfaqësuesja e Kosovës e papranuar nga FIBA, në përpjekjet për ndërkombëtarizim, mori rrugën drejt Egjiptit të largët dhe për herë të parë në histori të basketbollit pavarur, luajti në një turne ndërkombëtar.

Ishte ky udhëtimi triumfal ku Kosova mposhti kampionen e Afrikës dhe njërën ndër top 20 kombëtaret botërore

Do t’i rikujtojmë lojërat fantastike të 10-she së paharrueshme: Artan Mehmeti e Samiri, Mujo Thaqi, Floriani, Edo e Kuraja, Valdet Grapci, Ersid Luca Haxha, Graniti e  Mazreku të udhëhequr nga Bujar Loci e Mark Rodiqi, si dhe kryetari i FBK-së atëbotë, Belul Beqaj.

Të hënën nga ora 21, çka do që jeni duke bërë, harroni sepse ju pret ASISTI më special i sezonit : shpallja e më të mirëve në ASIST dhe Retro Asisti super ekskluziv: udhëtimi i paharrueshëm dhe triumfal i Kosovës në vendin e faraonëve: Aleksandria 2005.

Të hënën nga ora 21, rrini n’shpi dhe me ASISTIN kënaquni

E HËNË   27.04.2020

21:00   ART SPORT 1     /      00:10   KLAN KOSOVA

ASISTI 420  DHE   RETRO ASISTI: ALEKSANDRIA  2005