BASHKIMI FINALISTI I DYTË I KUPËS SË FEMRAVE

Në një ndeshje fantastike Bashkimi ka mundur Penzën me rezultat 77:80 (27:19, 18:27, 9:18, 23:16), për tu kualifikuar në finalen e madhe të Kupës së Kosovës në konkurrencën e femrave.

Vendaset e nisën ndeshjen më mirë, me një epërsi prej tetë pikësh, 15:8, e duke e rritur më shumë epërsinë në çerekun e parë deri në 12 pikë, 27:15, ndërsa kjo pjesë përfundon 27:19. Mysafiret nuk dorëzohen dhe kundërpërgjigjen shpejt, për të barazuar rezultatin në 31:31, e duke pasur epërsi deri në shtatë pikë, 33:40, kurse pjesa e parë përfundon me rezultat 45:46.

Prizrenaset vazhduan me lojë të mirë, për të ngritur epërsi në nëntë pikë, 45:54, megjithatë pejanet rikthehen shpejt dhe më pas zhvillohet një lojë e barabartë në parket, por në fund të periodës së tretë, vashat mysafire sërish shkëputen, ku rezultati në semafor pas 30 minutash ishte 54:64.

Lojë fantastike u zhvillua në dhjetë minutat e fundit. Kampionet e Kosovës zhvilluan një lojë shu:77, më të mirë, duke barazuar shifrat në 73:73 dhe 77:77, por në çastet vendimtare, basketbollistet e Bashkimit ishin më të vëmendshme, duke triumfuar 77:80, për tu kualifikuar në finalen e madhe, ku do të përballen me Prishtinën. Finalja zhvillohet të dielën nga ora 15:00 në Pejë.

Te Penza u dalluan Rael Whitsitt me 20 pikë e 15 kërcime dhe Taylor Barnes me 21 pikë, kurse te Bashkimi u dalluan Besjana Martinaj me 21 pikë e pesë asistime, Monieque Coker me 14 pikë e tetë kërcime dhe Hill Denise me 17 pikë e pesë kërcime.