BAMFORTH: I LUMTUR QË U RIKTHEVA, DO TË JAP MAKSIMUMIN PËR FITORE

Pas afro katër vitesh, Scott Bamforth rikthehet te Kosova në grumbullimin e Përfaqësueses.

Amerikano-kosovari iu bashkua ekipit të mërkurën, ku me disa nga basketbollistët tanë veçse ka luajtur edhe më herët. “Më kanë pritur shumë mirë. Me disa lojtarë kam luajtur më herët, kurse me disa është për herë të parë. Atmosfera është shumë e mirë”, shprehet Scott Bamforth për faqen zyrtare të FBK-së.

Ai flet për rikthimin te Kosova. “Jam i lumtur që jam rikthyer këtu. Stërvitjet shkuan shumë mirë, e kjo është shumë e rëndësishme. Ne po japim më të mirën tonë. Besoj që jemi të përgatitur për ndeshjen e sontme”, ka shtuar tutje basketbollisti i natyralizuar i Kosovës.

Bamforth është optimist për ndeshjen me Norvegjinë. “Sigurisht se besojmë në fitore. Për këtë jemi përgatitur maksimalisht. Kemi një ekip shumë të mirë dhe duam të fitojmë para tifozëve tanë. Ata janë motiv shtesë për ne. Më kujtohet se na kanë përkrahur gjithmonë dhe besoj se kështu do të jetë edhe nesër”, nënvizoi Bamforth.

Në Grupin C, Kosova, Danimarka dhe Norvegjia kanë nga një fitore dhe një humbje. Dardanët kanë një fitore (ndaj Danimarkës 78:73) dhe një humbje (nga Norvegjia 86:77). Vendi i parë kualifikohet tutje dhe vendi i dytë më i mirë nga tri grupet parakualifikuese.

Kosova-Norvegjia zhvillohet sonte nga ora 19:00 në Minatori të Mitrovicës.