Kosova kishte opsion bashkëpunëtorin e ngushtë të Atamanit me 3 trofe të Euroligës, por zgjodhi një francez

Prishtinë(AsistiOnline) – Federata e Basketbollit të Kosovës e ka prezantuar sot selektorin e ri të Përfaqësueses së Kosovës A.

Bëhet fjalë për francezin Jean-Denys Choulet, që deri në sezonin e kaluar ishte pjesë e skuadrës franceze, Chorale de Roanne.

Por AsistiOnline.com ka mësuar se Choulet nuk ishte zgjedhja e vetme e FBK-së, pasi për postin e të parit te Kosova ishte opsion edhe hiç më pak sesa bashkëpunëtori i ngushtë i njërit prej trajnerëve më të mirë në botë dhe më të mirit në Evropë Ergin Ataman, Cenk Yildirim.

Yildirim punon prej 10 vitesh me Atamanin, fillimisht tek Anadolu Efesi ku fituan dy herë titullin e kampionit të Euroligës e në edicionin e fundit fituan edhe me Panathinaikosit titullin e më të mirëve të Evropës.

Nuk mbaron me kaq, Yildirim i asiston që nga viti 2022 Atamanit edhe te Kombëtarja e Turqisë, punë që vazhdon ta bëjë edhe tash, derisa AsistiOnline.com ka mësuar ekskluzivisht nga burime të afërta me trajnerin Yildirim se përkundër që ai ka angazhman në Kombëtaren e Turqisë, në saje të respektit dhe dashurisë së madhe për miqtë e tij dhe shtetin e Kosovës, ka qenë i gatshëm ta marrë drejtimin e ekipit tonë kombëtar pa i shikuar shumë kushtet e ofruara, madje edhe Ergin Ataman mësohet ti ketë dhënë tërë mbështetjen e tij dhe premtimin se do ta përkrah në të gjitha format nëse ai merr drejtimin e Kosovës.

Vlen të ceket se trajneri turk, Yildirim tek Efesi ka punuar edhe si asistent i trajnerit të madh kroat, Velimir Perasovic.

Ndoshta një trajner të kalibrit të tillë dhe me kaq shumë ndikim ku shumë më lehtë mund të na vinin edhe yje të ndryshme evropiane për t’u natyralizuar (një  një emër te madh të Euroligës kishte në plan ta sjellë në Kosovë fillimisht në vizitë e pastaj edhe si natyralizim – emër i njohur për redaksinë tonë) dhe me tërë këtë potencial, këtë trajner Kosova ndoshta nuk është dashur ta humb, por ja që zgjedhja tashmë është bërë dhe se a është francezi Choulet zgjedhje e duhur te Kosova, sigurisht që këtë pritet ta dëshmojë koha dhe i urojmë shumë suksese e shumë fat.

/AsistiOnline.com/