FBK paralajmëron tifozët për masa të rrepta të sigurisë, tregon se çka nuk lejohet në palestër

nga Asisti Online në 12/02/2024

Prishtinë(AsistiOnline) – Nesër fillon organizimi i madh i Kupës së Kosovës në qytetin e bukur të Gjakovës.

Federata e Basketbollit të Kosovës sot ka bërë një njoftim të rëndësishëm rreth masave të rrepta që i ka vendosur në bashkëpunim me Policinë e Kosovës në mënyrë që ky event të kalojë siç është më së miri.

Në njoftim shkruan se Policia e Kosovës do të jetë e vendosur në perimetrin e sigurisë, me ç’rast do të bëjë filtrimin e shikuesve për moslejimin e bartjes së gjësendeve të palejuara apo të rrezikshme në portat hyrëse etj.

Gjithashtu kërkohet posedimi i dokumentit identifikues së bashku me biletë, përderisa ata që nuk posedojnë bileta nuk do të kenë mundësi të afrohen te portat e palestrës.

Ndërsa gjërat e palejuara përfshijnë:

• Mjetet piroteknike,

• Shishet e qelqit pavarësisht madhësisë,

• Shishet e plastikës pavarësisht madhësisë,

• Pijet alkoolike dhe substancat narkotike,

• Ushqim i çfarëdo lloji (përveç ushqimit të fëmijëve 24 muajsh),

• Ombrella,

• Armë zjarri ose armë të ftohta apo çfarëdo mjeti tjetër që mund të përdoret si armë,

• Sende të rënda (çanta shpine, karrige të palosshme etj.),

• Kamera profesionale dhe video kamera,

• Çdo material promovues racist, ksenofobik, politik, fetar.